तिम्रो कथा

आमाको रोग र भाइको भोकले सताएर
लाग्यौ अरब पैसा नामक "उपचार"कमाउन
आफ्नो मन मार्यौ ,शरीरको बैँसलाई गलायौ
केही बढी पल परिवारको साथ समाउन,
"कस्तो छस् बाबू" भन्दा बाँचेजस्तो गर्छौ
दुई थोपा आँसु बर्साउँदै हाँसेजस्तो गर्छौ
आजको दिन दुखको सागरमा पौडिँदै
भोलिका लागि खुसी साँचेजस्तो गर्छौ ,
न दशैमा आउँछौ न तिहार साथ ल्याउँछौ
घरमा त केवल पसिनाको कमाइ पुर्याउँछौ
आधा गाँस निल्दै कामतिर लाग्छौ
गाउँघर सम्झिँदै रातभर जाग्छौ ,
अरुले हेर्दा मात्र खुसी र शुन्य व्यथा
पैसाको बोटमा खेलेजस्तो देखिने
उदासिनताको मरुभूमिमा रुमलिएको
यो हो तिम्रो कथा , यो हो तिम्रो कथा ।